ILOILO CITY – Hugot nga ginamonitor sang Iloilo City Police Office (ICPO) ang lapnagon nga “double your money scam” sa syudad sang Roxas kag posible nga makapamiktima man ang scammers sa syudad sang Iloilo.
Sa exclusive interview sang Bombo Radyo kay Police Major Marlyn Roquero, Public Information Officer sang Iloilo City Police Office (ICPO), iya ginpahayag nga base sa latest monitoring sang ICPO, wala pa sang may narekord nga kaso sang nasambit nga scam sa syudad sang Iloilo.
Ginpaathag ni Roquero nga ang ini nga financial scam amo ang nagaganyat sa mga tawo pinaagi sa text message nga mag-invest sang kwarta sa diin pagkatapos sang 30 ka-adlaw magadoble ini.
Apang suno kay Roquero, madamo na sang balita nga may pila na ka pumuluyo sa syudad sang Roxas ang nabiktima sang scam.
Suno kay Roquero, ila man natukiban nga may pila ka taga syudad sang Iloilo nga nagakaganyat sa scam kag nagakadto sa Roxas City agud nga mag-invest sang kwarta.
Nagpanugyan man ang ICPO sa publiko nga dapat siguraduhon nga ligal ang pakadtuan sang kwarta nga gina-invest.
“dapat kun mag-invest ka, i-make sure mo gid eh nga ligal ina..ginpangabudlayan naton ang kwarta naton para mag-invest didto, so i-make sure naton nga ang aton nga gina-invest nga kwarta makadto man sa maayo eh indi nga gulpi lang, basi gulpi madula lang so sayang..nagahangad kita sang dako, in return gali wala,” pahayag ni Roquero.
Matandaan nga ginmanduan na ni Iloilo City Mayor Jerry Treñas ang National Bureau of Investigation (NBI) kag Iloilo City Police Office nga tapnaon ang mga nagalapta nga financial scam.
