Gin-ako sang DPWH 1st Engineering District nga may ara sang delay sa pag-update sang ila transparency portal.
Ini ang ginhalinan sang isyu matapos ginhingadlan ni Iloilo 1st District Representative Janette Garin nga “fake news” ang flood control project update sang Bombo Radyo, bisan pa nga halin mismo sa website sang Department of Public Works and Highways (DPWH) ang ginbasehan sang data.
Sa interview sang Bombo Radyo kay Engr. Carlo John Leysa, Construction chief sang DPWH First District Engineering Office, iya ginpahayag nga sa aktwal, 32 na ka proyekto ang completed samtang 20 ang wala pa na-include sa transparency portal bangod may ginaproseso pa nga mga dokumento sa central office.
Ginpaathag man sang opisina nga sa tion nga ma-aprubahan na ang mga dokumento sa central office, amo pa lang sina ang pag-encode sang Certificate of Completion sa Project Contract Management Application (PCMA), nga amo man ang basehan sang ginareflect sa transparency portal.
Dugang pa nila, ang mga report gin-encode anay sa PCMA antes ini magguwa sa transparency portal, apang indi ini automatic nga naga-reflect gilayon
Ang delay, suno sa ila, nagahalin sa pag-submit kag pag-apruba sang mga dokumento sa central office, lakip na ang kinahanglan nga pag-attach sang variation order.
Bangod sini, gin-ako sang DPWH nga may kakulangan sa pag-update sang ila system, nga nagresulta sa lain kag sala nga impormasyon nga ila gina-presentar sa publiko.
