ILOILO CITY- Nagapati ang bag-o nga regional director sang Department of Public Works and Highways Region 6 nga mas importante subong ang pagpangita sang solusyon sa kontrobersyal nga Ungka flyover sa baylo nga tumuron kun sin-o ang nakasala kun ngaa napalpak ang proyekto.
Sa interview sang Bombo Radyo kay Engr. Sanny Boy Oropel, iya ginpahayag nga bangud nga natabo na ang problema sa flyover, mas maayo nga mapadasig ang paghimo sang desisyon kun ano nga intervention ang ipatuman agud matigayon na ang rehabilitation sa pinakamadali nga panahon.
Suno kay Oropel, sa subong, samtang ginahulat ang amo nga desisyon sang Bureau of Design sang Department of Public Works and Highways Central Office, may ginahimo na siya nga pamaagi agud nga mabantayan sang maayo ang iban nga mga proyekto sa rehiyon agud malikawan ang kapareho nga sitwasyon sang Ungka flyover.
Samtang, nagpahayag naman si Oropel nga handa sila mag-atubang sa House inquiry sa tion nga patigayunon sa Iloilo ang ikaduha nga hugnat sini.
