ILOILO – Ginpisa-pisa sang Sangguniang Panlalawigan ang tiglawas sang Department of Public Works and Highways 6 tuhoy sa kakulang sang early warning device sa mga ginakayo nga road projects sa probinsya sang Iloilo.
Sa ginpatigayon nga session, madamu ang pamangkot ni Iloilo Vice Gov. Christine ‘Tingting’ Garin kay Engr. Ormel Santos, Assistant Chief sang Construction Division sang nasambit nga ahensya.
Lakip sa mga ginpamangkot ni Garin ang tuhoy sa rason kun nga-a kulang ang early warning device kag signages nga makita sa probinsya sang Iloilo, ano ang pagsulundan nga ginapatigayon sang ahensya sa monitoring sang mga under construction nga road projects, kun nga-a indi makabig nga standard ang ginapahamtang nga early warning device kag kun pila ang distansya sang signages gikan sa ginakaayo nga road projects.
Nagsabat si Santos apang sang ulihi, iya gin-ako nga wala siya nakahanda sang data presenstation bangud nga ulihi ang pagpahibalo nga siya ang magatambong sa session agud nga itiglawas ang Department of Public Works and Highways.
Sa pagpaathag ni Santos, kawayan ang ginahimu nga early warning device bangud nga kun steel ukon kabilya, daku ang matuga nga halit sa tion nga may aksidente.
Magluwas diri, ginakawat man ang mga early warning device nga himu sa steel rason nga ginahimu nga alternatibo ang kawayan.
Santo sa standard, 200 meters ang distansya sang early warning device gikan sa ginakaayo nga proyekto.
Nahibalu-an nga nag-ugat ang nasambit nga isyu tuhoy sa mataas nga numero sang aksidente nga natabo subong nga 2019.
