Nagdepensa ang Department of Public Works and Highways Region 6 may kaangtanan sa ila paggamit sang geofoam sa nagabawod nga porsyon sang Ungka Flyover sa Pavia, Iloilo.
Sa interview sang Bombo Radyo kay Engr. Sanny Boy Oropel, iya ginpahayag nga ang pagbutang sang geofoam sa piers 4, 5, kag 6 sang flyover amo ang solusyonkag tabunan sang asphalt overlay para nga magtapan ang porsyon sang flyover.
Suno kay Oropel, lain ang geofoam sa ordinaryo nga foam bangud masarangan sini ang ano man nga sahi sang salakyan.
Nakapasar man sa international standard ang compression kag elasticity sini kag ini ang worldwide- accepted methodology.
Dugang niya, nagamit naman ini sa iban nga flyovers, expressways kag skyways para mapadasig ang construction methodology kag makay-o ang problemado nga alignment.
Nahibaluan nga ginpainan sang P200 million ang pagkayo-o sang displacement ukon sinking issues sa piers 4, 5, kag 6.
Una na ginpahayag ni Oropel nga target nila nga mabuksan in full operation ang Ungka Flyover sa December 25.
