ILOILO CITY- Nagpaathag ang Department of Public Works and Highways (DPWH) Region 6 angot sa extension sang expiry date sang ginatukod nga Ungka flyover.
Sa interview sang Bombo Radyo kay Engr. Ormel Santos, Project Engineer sang DPWH Region 6, iya ginpahayag nga santo sa orihinal nga plano, Enero 2022 ang expiry date apang gin-extend ini sa Marso 2022.
Suno kay Engr. Santos, pila ka mga rason amo ang indi paborable nga tiempo kag ang mga variations kag extra work nga kinahanglan himuon nga wala nalakip sa orihinal nga plano.
Magluwas diri, tuman ka gamay man ang 420 ka adlaw nga ginhatag agud makompleto ang phase 3 sang proyekto.
Pahayag niya, sa subong, yara na sa 62.7 percent ang construction sang 453.70-meter long flyover.
Nahibaluan nga yara na sa phase 3 ang construction sang Ungka flyover nga may P340 Million nga funding apang ang total allocation sang proyekto umpisa sa phase 1 ang yara sa P622.7 Million.
Nag-abiso naman si Santos may kaangtanan sa patigayunon nga ulihi nga closure sa area para sa installation sang nabilin nga 16 ka girders sang flyover sa Oktubre 28 tubtob 30.
