Nagpaathag ang Department of Public Works and Highways (DPWH) Region 6 sa publiko kaangot sa mga debris nga nagkaladagdag sa Ungka Flyover sa Pavia, Iloilo nga nagtuga sang kahalitan sa mga motorista.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga ang aktibidad sa ibabaw sang Ungka Flyover amo ang ginapatigayon nga pagbutang sang load distribution lakip na ang expansion joints.
Suno kay Oropel, ang nagkaladagdag nga debris ang parte lamang sang chip off sang existing nga expansion joints sang flyover.
Ginmanduan man sini ang personnel sang ila talatapan nga butangan sang net agud nga indi na mahalitan ang mga motorista samtang nagalabay sa lugar.
Nagpasalig man ang natungdan nga sekyaron ang flyover agud mapabilin nga safe ang mga naga-agi, lakip na ang mga tawo.
