Temporaryo nga gindumilian ang mga opisyal kag empleyado sang Department of Public Works and Highways (DPWH) nga magbiyahe sa luwas sang pungsod.
Nakabutang ini sa memorandum nga ginpaguwa ni DPWH Secretary Manuel Bonoan kaangot suno sa iya sa commitment sang ahensya sa “transparency, accountability, kag public service integrity” samtang nga padayon ang imbestigasyon sa eskandalo sa flood control program.
Sandig sa memorandum, ginadumilian anay ang pagbyahe abroad para sa “personal reasons.” Epektibo gilayon ang nakasaad sa memo tubtub sa katapusan sang Nobyembre 2025 magluwas lang kun i-lift na ukon palawigon ang suspension.
Nakabutang naman nga exemption ang personal travel para sa “urgent medical reasons.”
Pahayag ni Bonoan, nagasanto ini nga suspension sa Omnibus Rules on Leave kag relevant issuances sang Civil Service Commission.
Matandaan nga sa mandu ni President Ferdinand Marcos Jr. nga lifestyle check sa tanan nga government officials, unahon man ang mga personnel sang DPWH.
Sakop sang order ang bilog nga executive department, apang ginhingyo man sang Malacañang sa iban nga ahensya kaangay sang Office of the Ombudsman, Commission on Audit, Bureau of Internal Revenue, kag Bureau of Customs, amo man sa local government units nga magpatigayon sang parallel probes.#
