ILOILO CITY – Indi mahimo mapasakaan sang kaso sang Iloilo City Government ang Department of Public Works and Highways – Iloilo City District Engineering Office (DPWH-ICDEO).
Sa interview sang Bombo Radyo kay Atty. Manuel Magbanua Jr., legal counsel sang Office of Building Official (OBO), iya ginpahayag nga nasaad sang doctrine of state immunity nga ‘the state may not be sued without its consent.”
Buot silingon, indi mahimo mapasakaan sang kaso sang ahensya sang gobyerno ang kaangay man sini nga ahensya.
Suno kay Magbanua, apisar indi ang mga ini mapasakaan sang kaso, apang indi dapat nga magsalig ang DPWH-ICDEO.
Ang dapat nga obrahon sang DPWH-ICDEO suno sa natungdan amo nga mag-comply sa gihapon sang tanan nga mga dokumento nga kinahanglanon agud makapadayon sa ila mga proyekto.
Ginpahayag sang natungdan nga sa tion nga wala sang building permit ang proyekto, indi man ang mga ini mahatagan sang certificate of occupancy.
Ang nasambit nga certificate suno sa natungdan ang isa ka legal document nga nagapamatuod nga ang isa ka propedad ang safe kag nakapasar sa tanan nga mga code kag usage requirements.
Nahibaluan nga santo sa Section 301 sang Presidential Decree 1096 ukon National Building Code of the Philippines, wala sang sin-o man nga indibidwal, korporasyon ukon ahensya nga makapatukod, mag-demolish ukon magkaayo sang isa ka structure tubtob indi ang mga ini makakuha sang building permit sa Building Official nga assigned sa isa ka lugar sa diin nahamtang ukon ipahamtang ang isa ka building.
