Nagalab-ot sa halos 2,000 ang bakante nga posisyon subong sa sulod sang Department of Public Works and Highways (DPWH).
Suno ini kay DPWH Secretary Vince Dizon kadungan sang flag-raising ceremony sang ahensya subong nga aga, Oktubre 20.
Pahayag sang tiglikom, hatagan sang prayoridad nga ma-promote sa sini nga mga posisyon ang current employees nga deserving, tampad, kag mapisan, lakip na ang job order employees.
“Our priority to fill these positions is within the DPWH. I want to promote and elevate deserving, honest, and hardworking people already in the agency, including our job order employees,” suno kay Dizon.
Pahayag sini, may kinamatarong man pati ang mga job order employee nga mapasaka ang posisyon agud nga mapuno ang 1,993 vacant positions.
“Just because you have been a job order employee for a long time doesn’t mean you have no right or opportunity to advance. You will be prioritized for nearly 2,000 vacancies,” dugang sini.
Ginpromisa man sang tiglikom nga indi na ma-atrasar ang sweldo para sa mga JO. Nagpaandam ini nga sipaon sa trabaho ang mga responsable pananglitan ma-late na naman ang sweldo.
Matandaan nga sa iya una nga adlaw sa pagpungko bilang DPWH Secretary, nagmandu si Dizon sang courtesy resignation sang mga opisyal sang amo nga ahensya. Sakop sini nga mandu ang tanan nga nagapungko sa mataas nga posisyon sa central office tubtub sa mga nagapungko sa district offices.
Nagbulos si Dizon bilang tiglikom sa DPWH sa tunga sang mga imbestigasyon sa mga iregularidad sa flood control projects kag iban pa nga lapnagon nga kurapsyon sa infrastructure projects.#
