ILOILO CITY — Ginpa-athag sang Department of Public Works and Highways Region 6 (DPWH 6) nga gintinghuwaan nga matapos ang rectification sang Ungka Flyover agud nga matigayon na nga mabuksan sa publiko sa iya nga full capacity rate.
Sa interview sang Bombo Radyo kay Engr. Sanny Boy Oropel, Regional Director sang DPWH 6, iya ginpahayag nga ginakonsidera sa rectification ang traffic condition bangud sa indi makaubra sang tayuyon bangud man sa nagapugok nga mga salakyan ilabi na kun rush hour.
Suno kay Oropel, ginalantaw man sang ahensya nga indi maapektohan ang water pipe connection, internet, kag phone connection sa idalum sang duta samtang ginaubra ang proyekto.
Ginapasiguro naman sang natungdan nga nagapadayon ang proseso kag nagahulag ang rectification apisar nga tuman na ka delay ini.
Nagpangayo man ini sang pag-intindi sa publiko bangud indi dali-dali nga makapatigayon sang jet grouting.
Nahibaluan nga sa subong kuntani nga bulan sang Mayo matapos ang rectification process sang phase 1 sang Ungka Flyover, apang bangud sa delay, indi sa gihapon matumod kun san-o ini posible matapos.
