𝗜𝗟𝗢𝗜𝗟𝗢 𝗖𝗜𝗧𝗬 — Indi na kinahanglan pa nga ipahanumdom sa Department of Public Works and Highways (DPWH) Region 6 nga dapat sila magpasa sang status report sang pito ka mga proyekto nga ginpauntat sang Iloilo City Government.
Ini kasunod man sang pagpanghingyo ni Iloilo City Administrator Mr. Melchor Tan sang status sang mga proyekto nga yara sa idalum sang amo nga ahensya.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga may yara sila sang department order nga maghatag sang report sa tanan nga mga proyekto kag indi sa pili lang.
Suno kay Oropel, maya yara sila sang ginasunod nga timeline nga sa kada una nga semana sang bulan, magahatag sila sang update sang mga proyekto sa tanan nga Local Government Units (LGU) sang syudad.
Ginpahayag man sini nga wala lang siguro nahatagan sang kopya ang City Administrator sang update sang mga proyekto rason nga nagpangayo ini sa ila ahensya.
Ginpaathag man ni Oropel nga tagsa ka bulan nagahatag sila sang accomplishment report sa local executive heads sang mga opisina.
Wala naman nagkomento si Oropel sa pagdeklara ni Iloilo City Mayor Jerry Treñas kay Engr. Roy Pacanan nga persona non grata sa syudad.
