JARO, ILOILO CITY – Nagpangayo sang paghangop sa publiko ang Department of Public Works and Highways (DPWH) sa atrasado nga pagkaayo sang karsada sa entrance sang Bankers Village sa Tabuc Suba, Jaro, Iloilo City.
Sa interview sang Bombo Radyo kay Engr. Sanny Boy Oropel, director sang Department of Public Works and Highways (DPWH) Region 6, iya ginpahayag nga sa subong, padayon pa nga ginakaayo ang drainage system bangud nagatuga sang pagbaha sa subdivision sa tion nga magbubu ang ulan.
Suno kay Oropel, ang gina-una nga kaayo amo ang duha ka inner lanes agud maagyan pa ang duha ka linya sang karsada sa outer lane.
Tungod sini, lauman ang pagpug-ok sang trapiko sa lugar.
Indi man mapadasig suno sa natungdan ang proyekto bangud ginahalungan nila nga indi matandog ang iban nga mga linya nga nakalubong sa karsada.
Ginalauman nga matapos ang proyekto sa Setyembre subong nga tuig.
