𝗧𝗨𝗕𝗨𝗡𝗚𝗔𝗡, 𝗜𝗟𝗢𝗜𝗟𝗢 — Nagpasalig ang Department of Public Works and Highways (DPWH) 1st District Engineering Office nga indi nila pagpabay-an ang dalan sa Brgy. Sibucauan, Tubungan, Iloilo.
Ini kasunod man sang reklamo sang pila ka mga residente kag motorista batok sa amo nga proyekto.
Sa interview sang Bombo Radyo kay Engr. Carlo Leysa, acting chief sang construction section sang 1st District Engineering Office, iya ginpahayag nga gina-monitor na nila ang hulag sang nasambit nga proyekto kon magy pag-uswag bala ukon wala.
Suno kay Leysa, sang ginsugodan na ang pagpangbak-bak sa karsada, wala nila na-anticipate ang pagbubo sang ulan nga bangud man sa malain nga panahon nga dala sang Habagat.
Ginalantaw man sini ang tyempo antes nga magbutang sang item 200 nga balas, bangud kon piliton nga butangan apisar nga basa, madugang lang ang lutak sang dalan.
Naghingyo man ini sa publiko sang gamay nga tyempo bangud sa sulod 2-3 days nga indi mag-ulan, posible na nga matambakan sang balas ang dalan.
Nahibaluan nga target kontani sang talatapan nga matapos ang proyekto sa Spetyembre apang bangud sa weather condition, ginalauman nga malawigan pagid ini.
Sa karon, yara na sa 30% ang accomplishment sang kontraktor sang ginareklamo nga dalan.
