Ginhabuyan sang madamo nga kritisismo si Department of Public Works and Highways (DPWH) Secretary Mark Villar kasunod sang iya gin-post nga drone-captured picture sang Iloilo Esplanade project.
Sa nasambit nga post sa iya opisyal nga Facebook page, ginpahayag ni Villar ang mga tinaga nga, “Drone inspection of the Iloilo Esplanade. #BuildBuildBuild.”
Gin-ulan ang amo nga post sang masobra 30,000 ka nanuhay-tuhay nga reactions kag indi magnubo sa 5,100 ka shares.
Sa comments section, ginlaslasan sang pila ka mga netizen si Villar angot sa ginapahayag pagkuha sini sang credit sa amo nga proyekto sa diin suno sa iban, sang 2012 pa gin-umpisahan ang proyekto — sang tion nga wala pa naka-umpisa ang Duterte Administration.
Gilayon naman nga nagdepensa ang pamunuan sang DPWH Build Build Build Committee.
Sa interview sang Bombo Radyo kay DPWH Build Build Build Committee chairman Anna Mae Lamentillo, iya ginpahayag nga ang picture nga kuha sang drone nga nagapakita sang Iloilo River Esplanade kag 6, 850 meter riverside promenade halin sa Jalandoni Bridge pakadto sa Forbes Bridge ang kabahin na sang ila transparency measure.
Suno kay Lamentillo, ini ang ginpondohan sang 2017 kag 2018 sa diin gintukod sang 2016 tubtob 2020 ang 8 out of 10 Esplanade Projects sa Iloilo River.
Posible suno sa iya nga ang ginatumod sang netizens nga proyekto nga nag-umpisa sang Aquino administration ang nagapatuhoy sa Esplanade 1, Esplanade 1 Extension, kag Esplanade 2 nga ginpondohan sang 2010 tubtob 2015.
Kun matandaan, Agusto 2012 sang pormal nga ginbuksan ang 1.2-kilometer Iloilo River Esplanade nga nagalawig halin sa Sen. Benigno Aquino Jr. Avenue padulong sa Carpenter’s Bridge sa distrito sang Mandurriao.
Si Senator Franklin Drilon ang nagpamuno sa amo nga proyekto sa diin ginpasakaan pa ang senador sang plunder complaint sang 2013 bangud sa ginapahayag pagbuya sini sang P70 million nga priority development assistance fund (PDAF) para sa Iloilo Esplanade I project.
Dugang pa ni Lamentillo, agud nga mapaathag sa publiko ang isyu, ginpahayag ni Villar sa iya separado nga Facebook post nga ang Esplanades 3 tubtob 10 ang may funding years halin 2016 tubtob 2020.
Buot silingon, may yara sang 10 ka proyekto sa idalom sang plan nga may nagkalain-lain nga funding years.
Sa subong, 6.385 kilometers na suno kay Lamentillo sa kabug-usan nga 9.035-kilometer Iloilo River Esplanade Project ang nakompleto na halin sang 2016 tubtob 2021.
