ILOILO CITY — Ginpakadtuan na sang Department of Public Works and Highways – Iloilo City District Engineering Office (DPWH-ICDEO) sa ila personnel ang Dungon Creek ilabi na ang reclamation nga gin-obra sang isa ka Chinese Businessman.
Ini pagkatapos nga ginpalab-ot sang Bombo Radyo ang angot sa pagpabuhos sang semento ni Andrew Ong sa mga ginpangtambak nga gabiyon.
Sa interview sang Bombo Radyo kay Engr. Rodney Gustilo, pakuhaan niya sang laragway kag iproseso ang report agud gilayon nga masumite sa ila legal office.
Indi naman maintindihan ni Gustilo kung ngaa direkta nga gin-defy sang chinese businessman ang nahisugtan sa pagsinapol sang nangligad kaupod pa ang iya abugado kag asawa amo man ang syudad sang Iloilo kag nanari sari nga ahensya.
Maga-coordinate naman ang DPWH sa City Government agud mangin isa kag bug-os ang desisyon sa pagpasaka sang kaso batok sa nahinambitan nga businessman.
Nahibaluan nga nakasugtan nga kung indi pagkuhaon ni Ong ang ginpangtambak sini, sukton sang DPWH sang balor sang pagpakuha sang gabiyon ang negosyante kag pasakaan sang kaso.