Gin-athag sang Department of Public Works and Highways (DPWH) Region 6 nga wala sang rerouting nga matabo sa traffic sa Ungka Flyover kundi ‘alignment’.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga magasugod na sila sang rectification kon sa diin, una na nga ginpangkakas ang mga aspalto sa pila ka piers nga nakitaan sang settlement.
Suno kay Oropel, ang traffic scheme subong ang mga motorista nga nagahalin sa Iloilo City kag padulong sa Pavia ang mahimo maka-agi sa right lane sang flyover.
Samtang, ang mga motorista naman nga nagahalin sa Pavia kag padulong sa Iloilo City ang mahimo nga mag-agi sa flyover kag magliko sa wala nga bahin agud magamit ang single lane nga nakadesignar.
Gin-athag man sang natungdan nga ginsiraduhan ang left lane sang flyover bangud man sa ginapatuman nga rectification.
Ginalauman naman nga magasugod ang construction karon sa gab-i samtang buksan naman sa full capacity ang Ungka flyover sa Disyembre 25, 2024.
