DPWH Region 6, naghatag na sang mandu sa ICDEO nga mag-comply sang mga requirements nga ginapangayo sang Iloilo City Government

𝗜𝗟𝗢𝗜𝗟𝗢 𝗖𝗜𝗧𝗬 — Naghatag na sang instruction ang Department of Public Works and Highways (DPWH) Region 6 sa Iloilo City District Engineering Office (ICDEO) agud nga mag-comply sang mga requirements nga ginapangayo sang Iloilo City Government.

Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6,
iya ginpahayag nga dapat sundon ang pagsulondan agud nga mapadayon na ang konstruksyon sang pito ka mga proyekto nga kulang sang mga permit.

Suno kay Oropel, obligasyon nila nga magsunod sang mga kinahanglanon agud nga ma-comply ang mga kakulangan.

Nagapati man ini nga bangud nagatindog ang proyekto sa duta sang syudad, dapat lang nga masunod ang mga rekisitos ilabi na nga ginpamatian ang ila nga hingyo sa city government.

Nagpasalig man ini sa publiko nga himuon ang tanan nga masarangan sang ahensya agud nga ang tanan nga proyekto ang mapadayon na nga mahuman.

Nahibaluan nga una na nga ginpahanugutan ni Iloilo City Mayor Jerry Treñas nga padayunon ang proyekto nga sea wall sa Rizal Estanzuela kag Brgy, Rizal Pala-pala Uno kag Dos, Iloilo City Proper.