𝗣𝗔𝗩𝗜𝗔, 𝗜𝗟𝗢𝗜𝗟𝗢 — Ginpaathag sang Department of Public Works and Highways (DPWH) Region 6 nga magahalin sa General Appropriation Act ang P15 million nga pondo para sa 3rd party consultant sang Aganan flyover.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga kinahanglan sang 3rd party consultant sa pag-access sang Aganan Flyover sa Pavia, Iloilo bangud ang United Technologies Consolidated Partnership (UTCP) ang nagapakita sang lain nga resulta sang data sang flyover.
Suno kay Oropel, luyag lang niya nga mangin mahinalongon agud indi magpareho ang resulta sa Ungka Flyover rason nga nag-request ang ahensya sang 3rd party consultant.
Ginpahayag man sini nga may yara tubtob July 9 ang perspective bidders agud magpasa sang ila requirements.
Ang mapilian nga bidder ang magahatag sang structural analysis kag maga-identify sang engineering solution para sa amo nga flyover.
Sila man ang magahimo sang engineering design lakip na ang presyo nga kinahanglanon sang proyekto.
Nagalaum naman ang Department of Public Works and Highways nga matapos ang bidding sa second week of July.
