Iloilo – Nagpasalig ang Department of Public Works and Highways Region 6 nga indi na maliwat ang natabo kahapon nga tuman ka lala nga traffic congestion sa Ungka flyover.
Matandaan nga kahapon sang aga, nahimo nga pedestrian overpass ang flyover bangud didto na nag-agi ang mga tawo bangud halos wala nagahulag ang mga salakyan sa sobra nga pagpugok sang trapiko.
Sa interview sang Bombo Radyo kay Iloilo 2nd District Representative Michael “Mike” Gorriceta, iya ginpahayag nga naistorya sini si Department of Public Works and Highways assistant regional director Jose Al Fruto kag nagpaathag ini nga wala na nahingagaw sang ahensya ang ginasemento sa idalom sang flyover rason sang traffic congestion.
Suno sa mamalidha, sang nagbisita si Public Works Secretary Manuel Bonoan sa amo nga lugar, ginpromisa ni Al Fruto nga antes ang Pebrero 14, hingagawon na sang ahensya agud “manami na agyan” ang idalom sang flyover.
May kaangtanan naman sa sunod nga obrahon sa kontrobersyal nga proyekto, ginpahayag ni Al Fruto suno kay Gorriceta nga nagahulat man sila sang sunod nga abiso halin sa central office sang ahensya.
Wala naman sang ideya si Gorriceta kun sin-o ang nagpahanugot sa mga tawo nga himuon nga overpass ang flyover agud nga indi lang ma-late sa trabaho kag sa eskwelahan.
Kahapon sang hapon, ginbutangan na sang baral ang entrance sang Ungka Flyover agud indi na maagyan liwat sang mga tawo.
