𝗜𝗟𝗢𝗜𝗟𝗢 — Plano sang Department of Public Works and Highways (DPWH) Region 6 nga i-improve ang ‘inlets’ ukon ang surface connection sang drainage nga nagakolekta sang tubig halin sa mga dalan.
Sa interview sang Bombo Radyo kay Engineer Sanny Boy Oropel, Regional Director sang Department of Public Works and Highways Region 6, iya ginpahayag nga may yara sang mga local road nga nagakonektar sa national road, apang sa subong, ang inlets sa bahin sang national road lang anay ang ila nga i-improve bangud man sa limitado ang budget.
Suno kay Oropel, basehan sa proyekto amo ang master plan sang drainage system sa Iloilo, kag kon may mga local road ang wala nakakonektar sa national road, magaduso ang ahensya sang proposal sang dugang nga budget.
Ginpahayag man sini nga bangud sa limitado ang budget, may mga national road sa rehiyon ang tubtob subong, wala sang drainage.
Gin-athag man ni Oropel nga masarangan nila nga maghatag sang assistance sa pag-propose sang pondo sa idalum sang Local Infrastructure Program, apang indi sila makasigurado kon ini ang gilayon nga maabruhan.
Nag-ako man ang natungdan nga indi ma-control sang ahensya ang kabaskogon sang pagtupa sang ulan nga rason sang pagsobra sang tubig sa mga drainage.
Nagapati man ang ahensya nga ang importante, amo nga nagadetso guwa ang tubig sa tanan nga water ways sang mga drainage, local man ukon national road.
