Dismayado gid si Department of Public Works and Highways (DPWH) Secretary Vince Dizon matapos niya personal nga ginbisita ang kontrobersyal nga Aganan Flyover sa banwa sang Pavia kaina sang aga.
Sa interview sang Bombo Radyo, ginpahayag ni Dizon nga makaulugot ang sitwasyon sang proyekto bangud halos lima ka tuig na ini nga nakatiwang-wang.
Imbes nga mangin solusyon sa trapiko, nangin isa pa gid ini ka daku nga rason sang padayon nga pagpugok sang dalagan sang trapiko sa amo nga area.
Ang Aganan Flyover ang may kabug-osan nga pondo nga ₱802 million nga ginlunsar sang Hulyo 2020, kag ginlauman nga matapos sa sulod sang 24 ka bulan ukon duha ka tuig, apang tubtob subong wala ini nahuman.
Dugang pa ni Dizon, may yara na sang bag-o nga tikang ang DPWH agud mapadayon ang konstruksyon sang ginhingadlan man sini nga “palpak” nga flyover.
May gin-allocate na nga halos ₱229 million nga pondo agud matapos ang proyekto sa tuig 2026, nga ginlaragway niya bilang “Christmas gift” ni Presidente Ferdinand Marcos Jr. para sa mga Ilonggo.
Antes magsugod liwat ang konstruksyon, magapatigayon anay ang DPWH sang konsultasyon sa mga foreign consultant nga magalawig sang halos isa ka bulan agud masiguro ang insakto kag husto nga pagpatuman sang proyekto.
Nagpasalig man si Dizon nga pasabton ang mga indibidwal nga yara sa likod sang “palpak” nga Aganan Flyover agud mahatagan sang hustisya ang kabudlay kag perwisyo nga ginaantos sang mga taxpayers bangud sang amo nga proyekto.
 Secretary Vince Dizon matapos niya personal nga ginbisita ang kontrobersyal nga Aganan Flyover sa banwa sang Pavia kaina sang aga.){kind=link}