ILOILO CITY– Magapatigayun sang temporaryo nga pagpasarado sang dalan ang Department of Public Works and Highways (DPWH), Iloilo City District Engineering Office sa duha ka dalan sa syudad sang Iloilo humalin Hulyo 16,2019 tubtob Abril 02,2020.
Sa interview sang Bombo Radyo kay Engr. Rodney Gustilo, Officer-In-Charge sang Iloilo City District Engineering Office, iya ginpahayag nga sa bahin sang dalan sa E-Lopez ang kabahin sang proyekto nga pagpa semento sini.
Suno kay Gustilo ila man nahibaluan nga makatuga ini sang pagpugok sang trapiko rason nga nagpakig-angot na sila sa talatapan ni Mr. Jeck Conlu ang pinuno sang Public Safety Transportation and Management Office (PSTMO).
Ginpahayag ni Gustilo nga ginpatawag man sila ni Iloilo City Mayor Jerry Treñas tuhoy sa nasambit nga temporaryo nga pagpasarado sang dalan.
Magluwas naman sa dalan E-Lopez, pagasementuhon man ang dalan Infante sa bahin sang Iloilo Doctors Hospital kag sang University of the
Philippines (UP).
Iya man ginsuhestyon suno kay Gustilo nga unahon ang sa bahin sang UP kag buksan ang sa pihak nga lane agud makalabay
ang mga salakyan.
Magluwas sa pagpasemento sang dalan paga-ubrahon man ang drainage system.
Ginpaathag sang natungdan nga Disyembre pa sang nagligad nga tuig na bid out ang proyekto apang bangud delayed man nga napasar ang 2019 budget nadelay man ang pag-award sang proyekto lakip na ang pagsugod sang konstruksyon lakip na ang banning sang nakaligad nga eleksyon.
