Target sang Department of Public Works and Highways (DPWH) nga umpisahan subong nga adlaw, Oktubre 6 ang rehabilitasyon sang mga imprastraktura nga naguba sa Cebu kasunod sang pag-igo sang magnitude 6.9 nga linog.
Suno kay DPWH Secretary Vince Dizon, pagatukuron na subong nga semana ang permanente nga mga pagkay-o sa mga naguba nga imprastratura sa lugar.
Ginpahayag ni Dizon nga nagbilin sang ginabulubanta P2.5 billion nga balor sang danyos ang linog sa mga dalan kag taytay sa probinsya.
Magluwas diri, wala pa sang final nga estimate ang halit nga naangkon sang mga eskwelahan kag ospital, gani posible pa nga magtaas ang kabug-usan nga kantidad sang danyos sa mga masunod nga inadlaw.
Samtang, base sa report sang National Disaster Risk Reduction and Management Council (NDRRMC), 713 ka imprastraktura na ang nahalitan sa Central Visayas, lakip pa ang 18,154 ka kabalayan nga apektado sa rehiyon.
