ILOILO CITY – Ginakasubo sang Sangguniang Panlalawigan sa Iloilo ang indi paghatag sang update sang Department of Public Works and Highways Region VI may kaangtanan sa depektibo nga Ungka flyover.
Sa interview sang Bombo Radyo kay Iloilo 4th District Board Member Rolando Distura, chairman sang Committee on Infrastructure sa Sangguniang Panlalawigan, iya ginpahayag nga Hunyo 2 subong nga tuig sang nagpromisa si Department of Public Works and Highways Region VI director Engr. Nerie Bueno nga magahatag sang update kag impormasyon ang ahensya sa collegial body kadungan sang ikaduha nga committee hearing.
Suno kay Distura, Hunyo 30 pa ang ginpahayag sang ahensya nga deadline sang third consulting firm nga Abinales Associates Engineers Plus Consultants agud nga magpasa sang resulta sang geotechnical investigation.
Apang suno kay Distura, tubtob subong, wala sa gihapon naka-update ang ahensya.
Sang damlag lang, nagtawag si Distura kay Assistant Regional Director Engr. Jose Al Fruto apang suno sa opisyal, napasa na sang regional office ang resulta sang imbestigasyon sa opisina ni Secretary Manuel Bonoan kag wala na sila sang hawid nga kopya.
Sa subong, suno kay Distura, indi pa siya makahatag sang masunod nga tikang sang Sangguniang Panlalawigan bangud nga pamangkuton niya ang iya mga kaupod.
Mahimo man suno sa natungdan nga personal ini nga magasulat kay Bueno kag kay Bonoan.
Una na nga nagpahayag si Bueno nga indi na sila makahatag sang komento may kaangtanan sa duha ka mga flyovers bangud nga may yara na sang kaso nga ginpasaka sa Office of the Ombudsman kag may yara man sang resolution nga naga-request sang legislative inquiry.
Posible suno kay Distura nga ini man ang mangin sabat sang ahensya sa ila.
