ILOILO CITY – Gin-athag sang Department of Public Works and Highways Region VI nga mahimo nga magpasakup sa bidding sa pagkay-o sang Ungka flyover ang sin-o man nga contractor nga kwalipikado.
Sa interview sang Bombo Radyo kay Engr. Sanny Boy Oropel, officer-in-charge sang talatapan, iya ginpahayag nga kwalipikado nga magpasakup sa bidding ang contractor nga may eksperyensya sa pagkay-o sang taytay.
Suno kay Oropel, indi mahimo nga malimitahan sang ahensya kun sin-o lamang nga contractor ang mahimo nga makapasakup.
Nahibaluan nga ang International Builder’s Corporation ang contractor nga nagdaog sa bidding sa pagkay-o sang Ungka flyover lakip na ang Aganan kag Hibao-an flyover.
Gin-athag naman sang opisyal nga wala siya sang otoridad sa paghambal kun sin-o ang dapat nga manabat sa palpak nga istruktura bangud nga indi man siya suno sa iya involved sang una nga ubra.
