ILOILO CITY – Dismayado ang mga local officials sa Pavia, Iloilo matapos nga nagpamalibad ang Department of Public Works and Highways Region VI nga maghatag sang mga dokumento nga ginapangayo sa ila may kaangtanan sa kontrobersyal nga Ungka kag Aganan flyovers.
Ang Committee on Infrastructure, Committee on Public Safety, kag Committee on Transportation sa Office of the Sangguniang Bayan sang Pavia, Iloilo ang nag-request sang presensya sang ahensya kag nagpangayo sang mga dokumento samtang wala pa naka-abot ang resulta sang soil test sang third party consultant nga Abinales Associates Engineers and Consultants (AAEC).
Lakip sa mga dokumento nga ginapangayo sang tatlo ka mga komitiba amo ang mga masunod:
*safety measures nga ipatuman samtang nagahulat sang engineering intervention sa Ungka kag Aganan flyover;
*resulta sang una nga soil test antes ang pag-ubra sang flyover;
*kontrata sa tunga sang contractor nga International Builders Corporation kag Department of Public Works and Highways;
*progress sang construction kun pila ka porsyento na ang natapos;
*percentage sang payment nga gin-release sang ahensya sa contractor;
*orihinal nga detailed engineering design sang mga flyover; kag
*revised detailed engineering design
Sa interview sang Bombo Radyo kay Sangguniang Bayan Member Leonardo Belasa, chairman sang Committee on Infrastructure, iya ginpahayag nga wala nakatambong ang sin-o man nga tiglawas sang Department of Public Works and Highways Region VI sa pila ka beses nga pag-imbitar sang komitiba.
Sa sabat sang ahensya nga pirmado ni Regional Director Nerie Bueno, nakasaad nga may yara na sang pending nga kaso sa Office of the Ombudsman kag may pending request para sa congressional investigation.
Suno pa kay Belasa, napasa na sang third party consultant ang report sini sang nagligad nga Hunyo 30, 2023 kag napasa na sa opisina ni Secretary Manuel Bonoan.
Dugang pa niya, ginpahayag man ni Bueno nga indi anay ini maghatag sang komento agud nga indi maunahan ang tikang ni Bonoan tubtob nga wala sang may mabaton nga instruction nagikan sa tiglikom.
Pahayag ni Belasa, wala man sang epekto sa kaso pananglitan ihatag sang ahensya ang mga ginapangayo nga dokumento.
Nagakabalaka man ang natungdan bangud nga posible nga makatuga sang delikado ang sitwasyon subong sang Ungka flyover.
Dismayado man ini sa iban nga mga local officials bangud nga wala nag-ugyon sa ila sang nagpatigayon sila sang hublag protesta may kaangtanan sa P680 million nga Ungka flyover kag P805 million nga Aganan flyover.
