ILOILO CITY – Nagdepensa ang Department of Public Works and Highways (DPWH) sa atrasado nga modification kag restoration sang P680-million nga depektibo nga Ungka flyover.
Sa interview sang Bombo Radyo kay Engr. Sanny Boy Oropel, Regional Director sang DPWH Region 6, iya ginpahayag nga wala ini sang nakita nga problema sa pagkaatrasar sang proyekto bangud normal lang ini nga nagakatabo.
Suno kay Oropel, lakip sa mga rason sa pagkaatrasar sang proyekto amo ang padayon nga paglabay sang mga salakyan sa flyover, madamo nga linya sang tubig, kuryente kag internet nga nakalubong sa karsada kag antad sa pormasyon sang duta sa idalom sang flyover.
Target kuntani nga matapos ang proyekto sang Mayo 6, apang naghatag ang ahensya sa contractor nga Davao City-based Monolithic Construction and Concrete Products Inc. sang 120 ka adlaw nga extension agud matapos ang Phase 1 sang rectification sa Ungka flyover.
Sa subong, yara pa lang sa 47% ang proyekto sa diin nag-umpisa ang jet grouting operations sang Enero 8, 2024 kag may budget nga P95.95 million.
Matandaan nga ginbuksan ang flyover sang Hunyo 2022, apang ginsirado sang Setyembre sa amo man nga tuig bangud sa reklamo sang mga motorista nga daw kaangay nga nagabalod maglabay diri kag nagabaha sa tion nga magbubo ang ulan.
Katuyuan sini kuntani nga mas mapadasig ang byahe halin sa Iloilo City padulong sa Iloilo International Airport sa Cabatuan, Iloilo.
Ini ang ginpondohan naman pinaagi kay former Senate President Franklin Drilon sa diin ang una nga contractor amo ang kontrobersyal nga International Builders Corporation.
