Nakadepende na sa Korte Suprema ang pinal nga desisyon kun magpursige ang mga petioners sa pag-file sang disqualification case batok kay presidential candidate Ferdinand ‘Bongbong’ Marcos, Jr.
Nahibaluan nga convicted si Marcos sa kaso nga failure sa pag-file sang income tax returns halin sang 1982 tubtub sa 1985.
Bangud sini, gina-insister sang petitioners nga isa ini ka sahi sang krimen nga naga-involve sang moral turpitude — isa ka act ukon behavior nga nagabayolar sang standard sang komunidad.
Suno pa sa pila ka mga human rights petitioners, dako man ini nga tampa sa Filipino citizens nga mapisan nga nagabayad sang income tax returns.
Una naman nga ginpahayag ni former Bureau of Internal Revenue (BIR) Commissioner Atty. Kim Jacinto- Henares sa interview sang Bombo Radyo nga ang pinaka-simple nga isyu nga dapat lagson kay Marcos amo ang pamangkot kun bala nadalasa ini sang Section 286 sang Presidential Decree No. 1994 ukon ang “Amended National Internal Revenue Code” nga may perpetual disqualification nga penalidad batok sa public officials nga na-convict bangud sang tax offenses.
Sa interview sang Bombo Radyo kay Atty. Noel Palomado, Bombo Abogado, iya ginpahayag nga malawig kag komplikado ang ini nga isyu bangud natukiban nga indi man covered sang Section 286 sang PD 1994 si Marcos bangud Enero 1, 1986 nag-take effect ang PD 1994.
Indi na public officer si Marcos sang Marso 18, 1986— ang petsa kun san-o kuntani natalana nga mag-file ini sang iya nga income tax returns para sa tuig 1985, rason nga indi applied sa anay senador ang amo nga penalidad.
Suno kay Palomado, kun makalab-ot gid man ang petition cases sa Korte Suprema, nagakadapat nga desisyunan na ini gilayon bag-o pa man ang adlaw sang eleksyon.
Pahayag sang abogado, kun mapilian si Marcos bilang presidente sang pungsod kag maggwa ang desisyon sang Korte Suprema nga indi gali ini kwalipikado sa posisyon, pat-od nga magaresulta ini sa kinagamo, hublag protesta kag mga rally.
