ILOILO CITY – Wala sang may mahimo ang mga pumuluyo nga naga jogging sa syudad sang Iloilo kundi magsuksok sang facemask apisar mabudlay magginhawa.
Sa interview sang Bombo Radyo kay Filomeno Sarsowa Jr., isa sa mga naga jogging sa Plaza Libertad, iya ginpahayag nga nagasuksok siya sang mask samtang naga jogging bilang pagsunod man sa executive order ni Iloilo City Mayor Jerry Treñas amo man sa mandu sang Inter-Agency Task Force kag Department of Health.
Suno kay Sarsowa, sa tion nga mag basa ang mask, mabudlay na magginhawa — gani ang iya gin-obra kun naga jogging, ang baba lang ang ginatabonan niya sang facemask.
Dugang pa sang natungdan, kun indi siya magsuksok sang mask, mahimo nga makit-an siya sang pulis kag dakpon ukon multahan sang P500 sang compliance team sang city government.
**
Indi kinahanglan nga magsuksok sang facemask ang mga tawo nga naga jogging ukon nagapatigayon sang physical activities.
Sa interview sang Bombo Radyo kay Dr. Florentino Alerta, iya ginpahayag nga gamay lang ang oxygen nga nagasulod sa baba kun naga mask samtang naga jogging nga mangin tunaan sang kabudlay sa pagginhawa sang tawo.
Kun open space, gamay lang ang tawo sa palibot kag gina-obserba man ang physical distancing, indi na kinahanglan pa nga magsuksok sang facemask.
Suno kay Dr. Alerta, sa tion nga basa ang mask samtang ginagamit, may posibilidad pa nga ma-absorb ang virus.
Dugang sang natungdan, common sense na lang kuntani nga nagaka-apektuhan ang ginhawa sang tawo kun kinahanglan gid ang mga ini nga magsuksok sang facemask samtang naga ehersisyo.
