ILOILO CITY – Nagapadayon ang pagpanalawsaw sa antibiotics sang mga eksperto sa Center for Chemical Biology and Biotechnology sa University of San Agustin nga mahimo magamit sa tion nga mapamatud-an nga mangin epektibo ini sa secondary bacterial infection sa mga tawo nga may yara sang Coronavirus Disease 2019 (COVID-19).
Sa interview sang Bombo Radyo kay Dr. Doralyn Dalisay, Director sang Center for Chemical Biology and Biotechnology kag DOST Balik Scientist, iya ginpahayag nga wala gina atake sang antibiotics ang virus kundi ang bacteria nga nagasulod sa lawas sang tawo bangud nagahina ang iya immune system tuga sang COVID-19.
Ang ginatumod nga bacteria amo ang isa ka sahi sang pamilya sang bacteria nga naga infect sang COVID-19 kag kun matigayon ang ini nga research, mangin dako ini nga bulig sa tanan bangud may yara na sang antibiotic nga maka target sang gintunaan sang pneumonia.
Suno kay Dr. Dalisay, ang research ang indi “overnight success” kundi may yara ini sang nagakaigo nga proseso.
Pahayag niya, yara na sa duha ka tuig nga naga padayon ang ila pagpanalawsaw kag nagpasalig ini nga indi sila mag untat tubtob nga ila mahibalo-an kun bala mangin epektibo ukon indi ang antibiotic.
Tubtob subong, wala sa gihapon sang bulong para sa COVID-19 nga makapatay sang virus bangud sa pagkamatuod, madugay ang proseso sang pagpanalawsaw.
Gani subong pa lang, naga research na ang grupo ni Dalisay agud nga kun mag-abot ang tion nga may yara sang pandemya sang bacterial infection sa ulihe, handa ang Pilipinas nga ini ang atubangon.
Dugang pa sang natungdan, mismo ang Department of Science and Technology, National Research Council of the Philippines kag Philippine Council for Health Research and Development ang nagahatag sang pondo sa ila agud nga matigayon ang pagpanalawsaw.
