ILOILO CITY – Handum sang bag-o nga presidente sang West Visayas State University nga himuon nga research university kag pasangkaron ang tanan nga program offering sang nasambit nga unibersidad.
Sa exclusive interview sang Bombo Radyo kay Dr. Joselito F. Villaruz, anay Dean sang College of Medicine sa West Visayas State University, iya ginpahayag nga bugal para sa iya nga mapili-an bilang presidente sang nasambit nga unibersidad tal-os kay Dr. Luis M. Sorolla Jr.
Suno kay Villaruz, bilang alumnus sang West Visayas State University, luyag niya nga mapasangkad ang mga programa nga ginatanyag sang nasambit nga unibersidad agud nga makatuga sang excellent graduates.
Ginpahayag ni Villaruz nga wala sang kamatuoran ang ginapalapta nga istorya batok sa iya sang nagapadayon pa ang screening sa magatal-os kay Dr. Sorolla rason nga siya ang ginsaligan kag ginpili sang board of regents nga magpamuno sa West Visayas State University.
Bilang presidente sang unibersidad, ginpromisa sang natungdan nga isa sa iya tutukan amo ang pagpasangkad sang mental health programs ilabi na subong nga madata ang suicide incident.
Si Villaruz ang nagtapos sa kurso nga Medicine sa nasambit nga unibersidad, nagpaidalom sa Residency Training in Pediatrics sa West Visayas State University Medical Center, nagtuon sang Master in Management Major in Public Management sa University of the Philippines – Visayas kag nagtuon sang Doctor of Philosophy Major in Educational Management sa West Visayas State University kun sa diin siya nagtrabaho bilang manunudlo.
