ILOILO CITY- Ginbalikan sang Chairman sang Florete Group of Companies nga si Dr. Rogelio Florete Sr. ang natabo nga pagkidnap sa iya 30 ka tuig na ang nagligad.
Sa interview kay Dr. Rogelio Florete Sr., iya ginpahayag nga ang hitabo makabig nga pinakamadulom nga bahin sang maragtas sang Bombo Radyo Philippines.
Suno kay Dr. Florete,Setyembre 4,1989 sang ginkidnap ini sang mga armado nga mga lalaki sa distrito sang Jaro.
Sang amo nga tion suno kay Dr. Florete, sakay siya sang iya salakyan upod ang iya anak nga si Margaret Ruth Florete nga amo subong ang Presidente kag CEO sang Bombo Radyo Philippines sang gin-ipit ang iya salakyan kag gintayaan sila sang armas gani napilitan ini nga buksan ang armado nga kalalakihan.
Sa pagsaysay niya, ginbuy-an sang mga suspek ang iya anak kag ginpapauli apang siya ang gindala naman sang mga suspek sa Talisay sa Negros Occidental.
Samtang yara sa kustodiya sang mga kidnapper, nangin dako nga pagpanghangkat pa gid para kay Dr. Florete ang pag-assassinate kay Bombo Rino Arcones,anay area Manager for Visayas sang Am Division sang Bombo Radyo sang Oktubre 17,1989.
Sang amo man nga tion, napatay man ang utod ni Dr. Florete nga si Teresita.
Naglawig sang 72 ka adlaw ang negosasyon antes ginhilway si Dr. Florete sang Nobyembre 14,1989,eksakto 30 ka tuig na ang nakaligad.
Samtang,pagtuo kag pagsalig sa Diyos ang nangin panaming ni Dr. Rogelio Florete Sr., chairman sang Florete Group of Companies kun ngaa nalampuwasan niya ang pinakadako nga pagtilaw sa iya kabuhi sang siya ang ginkidnap sa sulod sang 72 ka adlaw.
Suno kay Dr. Florete, sang yara ini sa kustodiya sang iya mga kidnappers, nagdumdom siya nga katapusan na sang iya kabuhi apang ang tanan gin-ampo niya sa Mahal nga Diyos.
Ginpahayag ni Dr. Florete nga madamo siya sang realisasyon kag natun-an sa natabo sa iya.
Isa na diri amo nga may mga tawo nga magahingalit sa mga pagpanghangkat kag kabudlay sang iban sa diin ginhalimbawa niya nga may isa ka waragwagan nga nagpalapta sang balita nga siya ang ginpatay na sang mga kidnappers.
Magluwas diri, narealisar man niya nga ano man nga pagtilaw ukon kabudlay ang may katapusan gid kun nagasalig sa Diyos.
Dako naman ang pagpasalamat ni Dr. Florete nga sa pihak sang natabo, madamo sa gihapon ang nagpabilin kag nagsakdag sa Bombo kag nagsalig nga malampuwasan sang network ang pagtilaw.
