ILOILO CITY – Wala gid nagpalingkang ang Bombo Radyo Philippines sa pagdul-ong sang 72- oras nga wala untat nga coverage sang natabo nga EDSA People Power Revolution sang Pebrero 22 tubtub 25, 1986.
Sa interview sang Bombo Radyo Dr. Rogelio Florete, Chairman sang Florete Group of Companies, iya ginpahayag nga apisar ginmando ni the late President Ferdinand Marcos ang pagpauntat sang operasyon sang mga estasyon sang radyo, nanindugan siya nga magapadayon sa pagpalayag sang mga balita.
Suno kay Dr. Florete, sa 72 oras nga pagahatag sang balita sa publiko, tatlo man siya ka adlaw kaupod ang mga anchormen nga wala nakapaligo agud nga mahatag ang latest update ukon sitwasyon sang Pilipinas.
Ginpatawag mismo ni Dr. Florete ang mga anchormen kag ginkonsulta kun bala luyag sang mga ini nga padayunon ang pag-broadcast.
Diri kag ginkasugtan sang tanan para sa serbisyo publiko nga padayunon ang pagpalayag sang mga balita sa kahanginan apisar nga may yara sang pagpamahog sa ila nga bahin.
Ang importante suno sa natungdan nga naintindihan nila tanan ang konsekwensya sa ila pagpadayon nga paglayag sa kahanginanan apisar ang kabaylo amo ang ila kabuhi.
Pahayag ni Dr. Florete, may yara sang mga soldado nga nagabantay sa idalom sang istasyon sang Bombo Radyo Iloilo sa diin may nagapadala sang mensahe nga untaton ang broadcast apang wala ini ginkakulbaan sang mga anchormen kag ginpadayon ang ila na umpisahan.
Nahibaluan nga ang Bombo Radyo Philippines s ang mabatian sa bug-os nga Pilipinas nga amo nagapadayon sang paghatag sang sitwasyon sa nagakatabo sa EDSA People Power Revolution.
