Ginpasidunggan ang Chairman sang Florete Group of Companies nga si Dr. Rogelio Florete bilang isa sa 2025 Captains of the Industry.
Ginhatag sang Philippine Chamber of Commerce and Industry (PCCI) Iloilo Chapter kay Dr. Florete ang nasambit nga award sa seremonya nga ginpatigayon sa Iloilo Convention Center kadungan sang PCCI 120 Years of Iloilo Chamber Movement Celebration.
Si Dr. Florete ang kalakip sa 12 ka mga Ilonggo entrepreneurs nga honorees ukon ginkilala bangud sa dako nga kontribusyon sini sa industriya sang media kag sa pagpasanyog sini indi lang sa Iloilo kundi sa iban nga bahin sang pungsod kag paghatag sang trabaho sa mga Ilonggo kag mga Pilipino.
Sa interview sang Bombo Radyo kay Engr. Fulbert Woo, presidente sang PCCI Iloilo, iya ginpahayag nga isa si Dr. Florete sa mga business leaders kag founders nga gintungdan ang dako nga papel sa pagbukas sang mga economic opportunities kag paghatag sang substantial kag quality employment.
Suno sa iya, ang pagkilala kay Dr. Florete kag sa iban pa nga nalakip sa 2025 Captains of the Industry honorees, bilang pinakaprestihiyoso nga pasidungog sa mga transformative business leaders, ang pamatuod sang ila nga dedikasyon sa ila nga industriya kag sa promosyon man sang positive values sa komunidad kag sa pungsod.
Magluwas kay Dr. Florete, ang iban nga 2025 Captains of the Industry honorees amo ang masunod:
- Emil Anthony Po – Agriculture
- Dr. Mary Lou Lacson-Arcelo – Education
- Raymundo Robles – Food Services
- Tomas Tan – Hardware
- Dr. Vicente Villareal – Healthcare
- Romeo Go – Hospitality
- Alfonso Uy – Manufacturing
- Dr. Rogelio Florete – Media
- Bernadette Tiu – Real Estate
- Jan Andrew Po – Transportation
- Posthumous: Rodolfo Tiu – Wholesale
- Posthumous: Que Hua Pho – General Merchandise
