Nakay-o na ang drainage inlet sa Jalandoni Street, Iloilo City Proper ini kasunod man sang madamo ang nagreklamo nga ginatunaan ini sang disgrasya.
Sa interview sang Bombo Radyo kay Joel Gerasmia, chief of staff sang City Engineer’s Office, iya ginpahayag nga nagbutang sila sang steel plate sa area agud matakpan ang proyekto, apang may yara nga nagtuyo nga kawaton ang steel plate rason nga wala ini nagtupong sa ginakutkot para sa inlet drainage.
Suno kay Gerasmia, gilayon naman nila nga ginpatabonan ang amo nga buho, apang ang steel plate ara sa gihapon sa kilid sini.
Gin-athag man sang natungdan nga amo ini ang nagapanguna nga problema nga ila ginapangatubang, bangud masami nga ginakawat sang pila ka mga scrappers ang ginatakop nga steel plate.
Ginpahayag man sini nga nasemento naman ang inlet drainage nga ginareklamo sa nasambit nga dalan.
Ginpasiguro man ni Gerasmia nga nagabutang gid ang talatapan sang early warning device sa mga proyekto nga ila ginatukod.
