Ginpa-Bombo ang isa ka drainage project sang Iloilo City District Engineering Office (ICDEO) sa Barangay Alalasan, Lapuz, Iloilo City nga isa sa ginatudlo nga nagpabudlay sa Bureau of Fire Protection (BFP) sang nagresponde sila sa sunog sa amo nga barangay kagab-i, Agusto 24.
Sa interview sang Bombo Radyo sa residente nga si Edita Jasmine, iya ginpahayag nga bangud sa drainage construction, magutok na ang ila nga dalan kag halos mag-ilinaway na ang mga driver bangud sa pagpug-ok sang trapiko.
Sa tion sang emerhensya kaangay sang sunog suno sa iya, indi gid makadali-dali sa paglabay ang bumbero bangud sa ila nga sitwasyon, magluwas pa nga may mga naga-park pa nga daan nga mga tricyle sa higad sang dalan.
Ginpahayag man sini nga may existing drainage naman sa ila nga barangay kag indi na kinahanglan ang ginatukod nga isa pa; bangud sa pagkamatuod suno sa iya, mas kinahanglan ini sa La Paz nga mas prone sa baha.
Pahayag sini, masobra isa ka bulan na nga utay-utay ang pag-obra sa amo nga proyekto.
Suno naman kay Barangay Kagawad Jomar Porras, indi tayuyon ang pag-obra sini bangud ginbalabagan man ini sang mga punong barangay sa kaiping nga barangay bangud may existing drainage project na kag ginalantaw nga indi naman kinahanglan ang kaangay nga proyekto.
Sa nakaplastar nga project billboard sa lugar, blangko ang impormasyon kun san-o nag-umpisa ang proyekto kag kun san-o matapos. Gintawag ang project nga Repair/Maintenance sang Drainage Structure sang dalan La Paz pa-Lapuz sa Barangay Alalasan.
Sa travel advisory naman nga ginbutang sang Mayo 23, 2025, ginpahibalo nga temporaryo nga pagsirado sa tuo nga lane sang apat ka lanes agud nga ma-facilitate ang pagkuha sang existing structures kag obstructions. Ginpahibalo man nga importante ang closure para sa pagtukod sang detention tank sa idalom sang Flood Mitigatikon Structure Project – Section 3. #
