𝗜𝗟𝗢𝗜𝗟𝗢 𝗖𝗜𝗧𝗬 — Apektado ang mga residente sang Barangay Tanza Bonifacio, Iloilo City bangud sa wala matapos-tapos nga drainage sa ila lugar.
Sa interview sang Bombo Radyo kay Ruth Gabion, residente sang nasambit nga barangay, iya ginpahayag nga masobra isa na ka semana nga wala sang may nagpakita nga kontraktor agud nga ubrahon ang amo nga proyekto.
Suno kay Gabion, bangud sa wala matapos, nagapondo ang tubig sa drainage rason nga nagabaho kag gina-istaran sang mga lamok.
Ginpahayag man sini nga wala nagakonektar sa main nga drainage paguwa sa baybay ang proyekto rason man kun ngaa nagapondo ang tubig.
Ginlaragway man sang natungdan nga masami nagabaha sa lugar ilabi na kun high tide.
Ginakabalak-an naman sang mga pumuluyo ang nagatindog nga mga kabilya ilabi na nga nagapabilin nga bukas ang drainage.
Nahibaluan nga tunga sa kilometro ang kalabaon sang drainage kag konektado padulong sa Brgy. Baybay Tanza, Iloilo City Proper.
