𝗟𝗔𝗣𝗨𝗭, 𝗜𝗟𝗢𝗜𝗟𝗢 𝗖𝗜𝗧𝗬 — Nagapabilin nga wala matapos ang drainage sa coastal road sang Brgy. Loboc, Lapuz, Iloilo City apisar Disyembre 2023 pa kuntani ini nga tapos na.
Sa interview sang Bombo Radyo kay Punong Barangay Esperedion Vijuan sang Brgy. Loboc, Lapuz, iya ginpahayag nga ginahulat niya nga magpadulong sa ila barangay ang kontraktor sang drainage bangud madugay na niya ini nga ginpatawag agud nga mahibaluan ang status sang proyekto.
Suno kay Vijuan, tuyo man sini nga mapaathag sang kontraktor sa mga residente ang rason sang delay nga paghuman sang proyekto.
Ginkwestyon man sini ang time frame sang proyekto bangud nakasaad nga Disyembre 2023 pa kuntani ini natapos.
Nagpanugyan man ini sa kontraktor nga butangan sang warning device ang drainage bangud delikado sa mga residente kag motorista, ilabi na kun kagab-ihon.
