Wala nalipay ang pila ka pumuluyo sa drainage sang Barangay Malipayon, Iloilo City Proper bangud sa wala nagahubas nga tubig-baha.
Suno sa concerned citizen nga nagpa-Bombo, bisan nga gamay lang ang ulan, nagasaka gilayon ang tubig nga maitom kag mabaho.
Pahayag pa sini, kada tuig, ang takop lang sang drainage ang gina-islan apang wala sang declogging halin sang nagpungko ang ila punong barangay.
Ginpahayag man sini nga sang damlag lang, ang solusyon sang kapitan amo nga pasuyupan lang ang tubig agud nga maghagan-hagan.
SABAT NI KAP
Sa interview naman sang Bombo Radyo kay Punong Barangay Frederick Hormillosa, iya ginpahayag nga nagaagi sa ila barangay ang tubig halin sa patyo sa Tanza. Sa kada mag-ulan suno sa iya, naga-subside man ang baha makaligad ang duha ka adlaw.
“Nagabaha man gid, pero kun mag-two days, naga-subside naman ang tubig. Gabaha sa amon kay tungod ang tubig sa Tanza Patyo, diri gaagi sa amon,” suno kay Kap. “Kun taason naman, laban-laban, ang aton pumuluyo, masulod naman ang tubig sa ila balay.
Bilang solusyon suno sa iya, nagbutang sila sang gamay nga alagyan sa kilid sang pader para makaagi ang mga pumuluyo. Dugang niya, nagbulig man ang City Government sa pag-declog — baliskad sa alegasyon sang tagreklamo nga wala gid sang declogging.
Gin-imbitar man ni Hormillosa ang tag-reklamo nga magpalapit sa iya agud nga mapaathag niya kun ngaa nagabaha sa ila barangay. Kun indi naman taga-Malipayon ang nagpa-Bombo, ginkwestyon sini kun ngaa nagapahilabot sa ila lugar.
“Kun naga-reklamo ka, kadto ka sa akon kay istoryahan ta ka,” suno kay Kap. Dugang sini: “Daw indi ko man siya constituent kay lain iya ngalan, indi ko kilala. Mga traidor na subong nga gaguluwa na. Mga traidor. Pakilala ka sa akon kay isaysay ko sa imo kun paano nga gabaha ang aton barangay.”
