𝗜𝗟𝗢𝗜𝗟𝗢 𝗖𝗜𝗧𝗬 — Nagpa-Bombo ang pila ka mga pumuluyo sang Brgy. Sinikway, Lapuz, Iloilo City bangud sa baha nga ginatuga sang delay nga construction sang drainage system.
Sa interview sang Bombo Radyo kay Daisy Jaleco, tagreklamo, iya ginpahayag nga mas madasig nga nagabaha sa ila lugar bangud sa indi matapos-tapos nga drainage.
Suno kay Jaleco, sang wala pa natukod ang drainage, wala gid kaagi baha ang lugar, apang sa subong, gamay lang nga ulan, insigida nga nagabaha.
Ginpahayag man sini nga sang wala pa ang proyekto, tuman ka tawhay ang ila komunidad kag wala sang ano man nga problema kun tig-ululan.
Nagpanawagan man ang natungdan sa kontraktor nga dasig-dasigon ang paghuman sang drainage bangud tuman ka damo na nga residente ang nahatagan sang huol bangud sa pagbaha.
Ginsegundahan naman ni Punong Barangay Felix Ventura ang reklamo sang mga residente bangud masami, kun mag-awas ang tubig sa karsada, nagakadto ini sa wala matapos nga drainage.
Suno kay Ventura, apisar sang pagpakalamalaut sa proyekto, may bentaha para sa mga taga-block 1-5 ang drainage bangud nakabulig ini sa pagpanubo sang baha sa amo nga lugar.
Ginpahayag man sini nga ang proyekto ang sa idalum sang Department of Public Works and Highways (DPWH) nga ginsugudan subong lang man nga bulan sang Hunyo.
Apang, bangud man sa pag-inulan-ulan, masami nga naga-utat ang konstruksyon, rason nga nagapondo man ang tubig-baha.
Gin-athag man sang punong barangay nga may mga porsyon sang drainage nga indi pa matapos bangud sa naapektohan ang poste sa Block 3 kag may posibilidad nga matumba ini kun matandog sang proyekto.
Isa man ka rason nga wala gin-ubra ang porsyon sang drainage sa nasambit nga lugar.
Nagpasalig man ini nga gindesponeran na sang MORE Electric and Power Corporation ang poste agud nga matigayon na tapos ang drainage.
