Nagpirma ang Lakas–Christian Muslim Democrats (Lakas-CMD) sa pagpanguna ni House Speaker Martin Romualdez sang alliance agreement sa major political parties sa Kamara.
Lakip diri ang Partido Demokratiko Pilipino-Lakas ng Bayan (PDP-Laban), National Unity Party (NUP), Nacionalista Party (NP), Nationalist People’s Coalition (NPC), Party-list Coalition Foundation Inc. (PCFI), Partido Navoteño, kag Centrist Democratic Party of the Philippines (CDP).
Sa sini nga agreement, nakasaad ang “full and unqualified support” sang tanan nga nagpirma nga partido para kay President Ferdinand Marcos Jr.
Diri man nga deal nakasaad ang nga ihatag ang “full and unqualified support” kay Romualdez bilang Lakas-CMD president.
Si Romualdez ang nagpirma para sa Lakas samtang si Ako Bikol party-list Rep. Zaldy Co kag Antipolo Rep. Roberto Puno naman para sa PCFI kag NUP.
Si Rizal Rep. Jack Duavit ang nagpirma para sa NPC kag Pampanga Rep. Aurelio Gonzales para sa PDP-Laban.
Si Romblon Rep. Eleandro Madrona naman ang nagpirma para sa Nacionalista Party.
“It also emphasizes the importance of unity and cooperation among all political parties. This is a critical message at a time when the country is facing a number of challenges,” pahayag ni Romualdez.
Natabo ang pirmahanay kadungan sang wala pa naga-untat nga huring-huring sang kudeta sa Kamara.
Ginpatigayon ang pirmahanay isa ka adlaw matapos ang statement sang Lakas-CMD chairman emeritus nga si Pampanga Rep. Gloria Macapagal Arroyo kun sa diin iya ginpanginwala nga may kongresista nga nagpapati sa iya nga may basbas halin kay First Lady Liza Araneta Marcos ang plano nga pagpahalin kay Romualdez bilang House Speaker.
Absent si Arroyo sang nagpirmahanay na sang alliance agreement kahapon sang hapon. #
