ILOILO CITY – Nagapadayon ang dredging sa Dungon creek sa Brgy. Calubihan, Jaro, Iloilo City.
Sa interview sang Bombo Radyo kay Punong Barangay Rodney Guintibano, iya ginpahayag nga yara na sa Bolilao-Bakhaw area ang ginatinlu-an rason nga wala na sang pagbaha sa ila lugar.
Suno kay Guintibano, matinlo na ang suba rason nga maka-ilig sang maayo ang tubig ilabi na sa tion nga mag-ulan.
May yara man suno kay Guintibano sang alarm system agud nga ipahibalo sa mga pumuluyo nga kinahanglan na nila nga mag-evacuate sa tion nga madali na lang nga maglapaw sa pangpang ang tubig.
Magluwas sa dredging, isa man sa ginatutukan niya suno kay Guintibano kun paano mahagan-hagan ang basura nga ginahaboy sa ila nga Material Recovery Facility.
Sa pagkamatuod suno kay Guintibano, indi lang ang mga pumuluyo sa ila barangay ang nagahaboy sang basura sa Material Recovery Facility kundi lakip man ang mga naghalin sa kaiping nga lugar.
Kun Oplan Hawan naman ang pagahambalan, ginpahayag sang Punong Barangay nga kampante siya nga nakuha na ang kalabanan sa mga obstruction kag maligwa na ang dalan sa ila barangay.
