Ginkalipay ni anay anay Senate President Franklin Drilon nga sa subong napuslan na sang mga Ilonggo ang Jaro Floodway, nga ginadayaw sang kadam-an bangud sa daku sini nga bulig sa pagpugong sang pagbaha sa syudad.
Sa interview sang Bombo Radyo kay Drilon, iya ginpahayag nga matapos ang asud-asud nga bagyo nga naglaslas sa pungsod kag nagtuga sang pagbaha sa madamo nga lugar, mas nakita sini ang importansya kag resulta sang proyekto nga iya ginpatigayon sang una.
Suno sa iya, ang Jaro Floodway amo ang isa sa mga infrastructure projects nga naghatag sang proteksyon sa mga pumuluyo sa bilog nga syudad sang Iloilo.
Gindugang ni Drilon nga isa ini ka panghangkat sa bag-o nga henerasyon sang mga lider nga magpatukod man sang mga proyekto nga makahatag sang bugal kag benepisyo sa mga Ilonggo, ilabi na sa tion sang kalamidad.
Ginpabutyag man sini nga natungdan na niya ang iya bahin bilang isa ka public servant kag ginbilin nga padayonon kag sustineron sang mga bag-o nga lider ang mga proyekto nga nagahatag sang “sense of pride” sa Iloilo.
Nahibaluan nga nakumpleto ang konstruksyon sang Jaro Floodway sang 2011, pinaagi sa pagpaninguha ni Drilon sa pagpasiguro nga makumpleto ang pondo sa idalom sang administrasyon ni anay President Gloria Macapagal-Arroyo.
Ang proyekto naghatag sang alagyan sang tubig halin sa kabukiran padulong sa baybayon, nga nagprotekta sa madamo nga mga pamalay sa syudad batok sa lapnagon nga pagbaha nga dala sang bagyo.
