Natigayon nga mapaguwa sa presuhan ang driver sang awto nga nakabunggo-patay sa tatlo ka mga babaye nga nagalakat sa kilid sang dalan sa Barangay Pungtod, Cabatuan sang Sabado.
Sa interview sang Bombo Radyo kay Police Captain Aileen Lacrite, hepe sang Cabatuan Municipal Police Station, iya ginpahayag nga una na nga nagpasaka sang kaso ang himata sang 72-anyos nga biktima batok sa driver apang, nag-execute ang bata sang biktima sang withdrawal of complaint, nga nagresulta sa pag-release sa suspetsado gikan sa custodial facility.
Suno kay Lacrite, may yara naman kuntani sang nakahanda nga kaso halin sa pamilya sang duha pa gid ka mga biktima, apang nagpadulong ang ila mga himata sa estasyon kag nag-execute sang affidavit of non-interest sa kaso.
Ginpahayag man nga nagsugilanon na ang magkatuhay nga kampo kag natigayon nga mag-areglohanay, kun sa diin gin-estoryahan ang plano nga pagbulig sang driver sa mga pamilya, lakip na ang bulig sa palubong sang mga biktima.
Kun matandaan, ang mga biktima kanday alyas Berta, 72-anyos; alyas Fely, 58-anyos lunsay taga-Cabatuan kag alyas Heidi, 59-anyos nga taga-Lambunao.
Halin sa banwa sang Pavia ang salakyan kag pauli na kuntani sa Maasin apang natulugan ang driver sini.
Gindala pa sa ospital ang mga biktima apang lunsay gindeklarar ang mga ini nga dead-on-arrival.
