Milagro nga nahatagan liwat sang ikaduha nga tyansa nga mabuhi ang isa ka lalaki matapos anum ka adlaw nga na-trap sa iya salakyan nga nahulog sa idalom sang taytay.
Natabo ini kay Matthew Reum, 27, residente sang Mishawaka, Indiana sa Estados Unidos sang Amerika.
Sang Disyembre 20, samtang nagamaneho si Reum, wala sini na-kontrol ang iya pick-up kag nahulog gid sa pil-as, nagligid sang pila ka beses, kag halos wasak na sang nagtupa sa idalom sang taytay.
Nakaposisyon ang pickup sa area nga indi ini madasig nga ma-notisyaran rason nga bisan ano ka singgit ni Reum, wala gid sang nakabulig sa iya. Halos madulaan na ini sang paglaum bangud indi man niya malab-ot ang iya cellphone kag indi siya maka-kontak sa iya pamilya kag mga abyan.
Suno sa Indiana State Police, anum ka adlaw ang ginlawig ni Reum nga nakabarikutot lang sa sulod sang salakyan kag nagainom lang sang tubig-ulan.
Sang Disyembre 26, isa ka adlaw pagkatapos sang Paskuwa, may duha ka lalaki nga nagpaliwa-liwa kag naghagaday nga magpangisda samtang nagahulat sila sa ila nga mga asawa.
Didto kag ila nanotisyaran nga may maga-idlak sa idalom sang taytay, kag sang ginpalapitan, wasak ini nga pickup nga may sulod pa nga tawo.
Suno sa nakakita nga si Mario Garcia, 60, ginpinsar niya nga patay na ang lalaki apang sang gintandog niya ang abaga sini, amo na lang ang iya kakibot nga naghulag si Reum kag nakahambal pa.
Gin-airlift si Reum kag gindala sa ospital bangud sa iya mga samad nga delikado suno sa pulis kag posible gid nga iya ikamatay kun wala ini gilayon nakit-an.
Gindugang man sang pulis nga pananglitan nagtinir pa si Reum sang isa pa gid ka gab-i sa amo nga salakyan sa idalom sang taytay, posible nga indi na masarangan sang lawas sini ang temperatura.
Gin-utod ang tiil sini kag nagapabilin subong sa intensive care suno sa Boilermakers Local 374 union.
“Matt Reum wants to thank everyone for the outpouring of support and all the well wishes, including the good Samaritans who found him, the first responders and his caregivers at Memorial Hospital,” kabahin sang statement sang Beacon Health System.
Sa subong, nagapabilin nga kritikal ang kondisyon sang pasyente.
“Matt knows he has a story to tell, and when he is ready, he plans to share details of that experience,” kabahin pa sang statement.# (Photo: WGN)
