Ginserbihan na sang show cause order sang Land transportation Office 6 (LTO-6) ang driver sang salakyan nga nag hit-and-run sang mga baligyaan sa Barangay Baldoza, La Paz kag natirohan sang mga pulis nga nagresponde.
Sa interview sang Bombo Radyo LTO-6 Regional Director Atty. Gaudioso Geduspan II, iya ginpahayag matapos gindagdag ang show cause order sa driver nga isa ka doctor, ginhatagan ini sang lima ka adlaw agud magsabat sa mga ginapatihan nga traffic violations, suno sa regular nga proseso sang ahensya.
Apang, bangud sa impormasyon nga ara pa sa ospital ang driver kag nagapaidalom sa medical treatment, ginpahayag ni Geduspan nga mahimo nila mahatagan sang konsiderahon ang request para sa extension kon indi ini makasabat sa ginpatuman nga deadline.
Matadaan man nga una na nga napasakaan sang Iloilo City Police Office (ICPO) ang doctor sa kaso nga Serious Resistance and Disobedience to a Person in Authority or the Agents of Such Person sang Article 151 sang Revised Penal Code kag Attempted Homicide.
