Gin-release sang San Dionisio Municipal Police Station ang driver sang pick-up nga nakabunggo-patay sa mag-asawa kag sa ila anak sa Barangay Canas, San Dionisio, Iloilo.
Ang mga biktima amo sanday alias Artemio, ginabanta 60-anyos; alias Angelie, ginabanta 50-anyos; kag ang 15-anyos nga bata nila nga si alias Angelie, lunsay residente sang Barangay Cubay sa amo nga banwa.
Ang driver naman sang pick-up truck amo si alias Alex, 26-anyos nga negosyante kag residente sang Calinog, Iloilo.
Sa interview sang Bombo Radyo kay PCapt. Eduard Villanis, Hepe sang San Dionisio MPS, iya ginpahayag nga nakaguwa ang driver bangud nag-lapse ang reglementary period sini kag wala maka-file sang kaso ang nabilin nga himata sang mga biktima.
Suno kay Villanis, ‘las-6:00 sang aga tubtob ‘las-3:00 sang hapon kahapon nga adlaw ang ila ginhulat sa mga himata agud nga magpasa sang death certificate kag letter of complaint agud matigayon nga mapasakaan sang kaso ang driver.
Apang nagligad lang ang nakatalana nga period, wala sang may nagpadulong sa ila nga istasyon.
Kun madumduman, ginbawian sang kabuhi ang tatlo ka miyembro sang amo nga pamilya samtang sakay sang motorsiklo matapos mabungguan sang hilux pick up sang Nobyembre 9, 2024 sang gab-i.
Nagaguwa naman sa imbestigasyon nga madulom ang dalan sang nag-overtake ang hilux pick-up sa na-wala nga porsyon sang dalan, apang, nayudyod sini ang motorsiklo sang ginabanta 100 metros ang kalayuon.
