ILOILO CITY – Padayon pa nga ginapangita ang driver sang itom nga Toyota Fortuner nga naka hit and run sang gwardya sa Sen. Benigno Aquino Jr. Avenue, Mandurriao, Iloilo City.
Sa interview sang Bombo Radyo kay Police Master Sergeant Alfredo Masamong Jr., traffic investigator sang Mandurriao Police Station, iya ginpahayag nga buron ang kuha sang Closed Circuit Television camera rason nga indi makita ang plaka sang salakyan.
Suno kay Masamong, maathag nga nag counter flow ang pribado nga salakyan rason nga nabunggu-an-patay ang gwardya nga si Jemar Celebrado, 39, kag temporaryo nga nagatinir sa Brgy. San Isidro, La Paz, Iloilo City.
Ginpahayag ni Masamong nga bangud nga madamo ang nagapanag-iya sang itom nga Toyota Fortuner, mabudlay nga pangitaon ang unit nga amo ang nakabunggo-patay sa biktima.
Sa pihak sini, indi mag-untat ang imbestigasyon suno sa natungdan tubtub nga makilala ang driver sang salakyan.
