Nagapangatubang sang sampaw-sampaw nga bayolasyon ang driver kag operator sang jeep nga nadisgrasya sa Barangay Maninila, Miagao, Iloilo sang Sabado kung sa diin 58 ang pilason sa 70 sini ka mga pasahero.
Ang driver amo si Robert Alemania, 36-anyos kag residente sang Brgy. Baong, Alimodian, Iloilo.
Subong nga adlaw, gin-anunsyo ni Land Transportation Office (LTO) 6 Director Atty. Gaudioso Geduspan II nga magapatigayon sang imbestigasyon batok sa driver kag posible nga dagdagan ini sang lifetime ban ukon indi pagtugutan nga makakuha sang lisensya.
Nahibaluan nga sang tuig 2014 pa nakakuha sang lisensya ang driver kag ini nag-expire na sang tuig 2015.
Samtang, sa bahin sang operator, mahimo man nga i-revoke sang ahensya ang iya nga Official Receipt sa bayolasyon nga pagpamaneho nga wala sang lisensya.
Ginhatagan man sang lima ka adlaw ang driver agud magsabat sa show cause order nga gindagdag sa iya kahapon nga adlaw.
